Rektorja e Universitetit “Isa Boletini” në Mitrovicë (UIBM), prof.dr. Nurten Deva, ka pritur në takim kryetarin e Federatës së Sporteve Universitare, prof.dr. Musa Selimi, ku është diskutuar për punën dhe të arriturat e kësaj federate. Rektorja e ka uruar profesorin Selimi për rizgjedhjen në krye te Federatës së Sporteve Universitare, institucion ky që ka mobilizuar studentët në sporte të ndryshme.

Rektorja, e cila në takim shoqërohej edhe nga prorektori për Zhvillim Akademik dhe Cilësi, prof.dr. Sabri Avdullahi dhe Sekretari i Përgjithshëm, Avdyl Beqiri, shprehu mbështetje për federatën dhe punën e tyre. “Studentët tanë kanë treguar suksese në garat që janë organizuar nga Federata e Sporteve Universitare brenda dhe jashtë vendit dhe jemi të inkurajuar me angazhimin e tyre që patjetër duhet të vazhdojë”, tha ajo.

Ndërsa, kryetari i Federatës së Sporteve Universitare, prof.dr. Musa Selimi, i cili shoqërohej edhe nga anëtari i bordit të kësaj federate, Alban Fazliu, falënderoi rektoren për pritjen dhe mbështetjen. Ai e vuri theksin në rolin e sportit në jetën studentore dhe rëndësinë e bashkëpunimit të mëtejshëm mes institucioneve arsimore dhe federatave sportive.