Ambasadori i Finlandës, Matti Nissinen, vizitoi Fakultetin e Teknologjisë Ushqimore, ku u prit nga dekani, Prof. dr. Mensur Kelmendi, i shoqëruar nga prorektori, Prof. ass. dr. Bahtir Hyseni, prodekani, Prof. dr. Mehush Aliu dhe koordinatori i projektit DualAFS, ass. dr. Arbër Hyseni. Gjatë takimit, u diskutua mbi programet akademike, hulumtimin shkencor dhe mundësitë për bashkëpunim.

Dekani Kelmendi e falënderoi ambasadorin për vizitën dhe e informoi mbi zhvillimin e kurrikulave, si dhe avancimin e mësimit online përmes klasës hibride – një projekt i financuar nga DualAFS dhe i finalizuar me mbështetjen e Savonia University of Applied Sciences në Finlandë.

Ambasadori Nissinen theksoi rëndësinë e ndërlidhjes së programeve të studimit me tregun e punës dhe shprehu gatishmërinë për të mbështetur zgjerimin e bashkëpunimit me universitetet finlandeze. Ai shtoi gjithashtu se janë të hapur për organizimin e ligjëratave për studentët mbi tema që lidhen me legjislacionin ushqimor.

Pas takimit, ambasadori vizitoi ambientet e FTU-së, përfshirë klasën hibride, laboratorët mësimorë dhe ato hulumtuese. Gjatë vizitës, u njoh nga afër me hulumtimet që realizohen nga stafi akademik dhe studentët, si dhe me projektet aktuale, konkretisht në projektin për kokrrat e kafesë 2.0.