Fakulteti Juridik i Universitetit “Isa Boletini” në Mitrovicë ka zhvilluar një traditë të fortë në kombinimin e mësimit teorik me praktikën profesionale, duke ofruar mundësi për studentët të përfshihen drejtpërdrejt në sistemin gjyqësor të Kosovës. Ky angazhim i përkushtuar ka si qëllim zhvillimin e shkathtësive praktike dhe përgatitjen e studentëve për sfidat e fushës juridike.

Në vitin akademik 2024/2025, një numër i konsiderueshëm studentësh të Fakultetit Juridik janë duke marrë pjesë në praktikën profesionale gjyqësore, e cila zhvillohet në Gjykatën Themelore të Mitrovicës, si dhe në degët e saj në Vushtrri dhe Skenderaj. Kjo mundësi ofron një eksperiencë të vyer për studentët, duke i përgatitur ata për një karrierë të suksesshme në fushën e drejtësisë.

Për të informuar dhe mbështetur pjesëmarrësit në këtë proces, Dekani i Fakultetit, Prof. asoc. dr. Qerimi, organizoi një takim me disa nga studentët që po zhvillojnë praktikën profesionale. Gjatë këtij takimi, studentët shprehën mirënjohje për mbështetjen intensive që po marrin nga stafi gjyqësor, duke theksuar rëndësinë e këtyre mundësive për zhvillimin e aftësive praktike dhe profesionalizmit të tyre. Ata gjithashtu rekomanduan që kjo praktikë të vazhdojë dhe të jetë e hapur për brezat e ardhshëm të studentëve të Fakultetit Juridik.

Në përfundim të takimit, Dekani Qerimi vlerësoi lart bashkëpunimin me institucionet gjyqësore të Mitrovicës, Vushtrrisë dhe Skenderajt, të cilat kontribuojnë vazhdimisht në avancimin e aftësive praktike të studentëve dhe në forcimin e lidhjeve mes akademisë dhe praktikës juridike.