Fakulteti Ekonomik në Universitetin “Isa Boletini” në Mitrovicë (UIBM) ka pranuar një donacion prej 200 librash nga projekti “Economics Fundamentals Initiative” me bazë në Amerikë. Qëllimi i këtij projekti është promovimi i librit të ekonomisë “Ekonomiksi i Mendimit Praktik”, në kuadër të rrjetit të partnerëve lokal në Evropë dhe Azi.

Asistentja e këtij projekti, Argjenta Plakolli, tha se libri në gjuhën shqipe është i përkthyer nga anglishtja dhe shkruar nga profesorë universitar amerikanë. “Qëllimi i librit është t’ju ndihmojë studentëve të ekonomisë, të rinjve dhe audiencës në përgjithësi të bëjnë vendim-marrje të shëndoshë ekonomike, zhvillim profesional të suksesshëm dhe prosperitet personal e kombëtar”, tha ajo.

Ndërsa, dekani i Fakultetit Ekonomik, prof. asoc.dr. Qazim Tmava, falënderoi asistenten, Plakolli për këtë fond librash. “Jemi mirënjohës për mbështetjen tuaj me këtë fond librash që do ta pasuroj bibliotekën e Fakultetit Ekonomik dhe do të rrisë mundësitë e zgjerimit të dijes për studentët tanë”, tha ai.

Deri më tani libri është përkthyer në 6 gjuhë të ndryshme.