Fakulteti Juridik organizoi një ligjëratë të hapur për studentët e tij me temën: “Luftimi i Antigjipsizmit, Raportimi Etik dhe Korniza Ligjore e Mbrojtjes së Komuniteteve Jo-Shumicë në Kosovë”.

Ligjëratën e mbajti Dr. sc. Lendrit Qeli, i cili foli për temën në kuadër të projektit “Platforma Mediale për Informim, Vetëdijesim dhe Raportim Etik për Komunitetet Rom, Ashkali dhe Egjiptian”. Ky projekt mbështetet nga Zyra e Kryeministrit për Çështje të Komuniteteve dhe implementohet nga mediumi egjiptian PROSPERITETI CHANNEL.

Dr. Qeli ofroi një analizë të thelluar mbi historikun e këtyre komuniteteve, zhvillimin e tyre shoqëror dhe integrimin në shoqërinë kosovare, si dhe sfidat që ata përballen. Ligjërata tërhoqi interes të madh dhe u ndoq me vëmendje të madhe nga studentët e Fakultetit Juridik.

Në përmbyllje të ligjëratës, Dekani i Fakultetit, Prof. Dr. Qerimi, shprehu falënderimet për Dr. Qelin për angazhimin dhe gatishmërinë e tij për të mbajtur këtë ligjëratë për studentët, si dhe e përgëzoi për kontributin e tij më shumë se dy dekada në avancimin e komuniteteve jo-shumicë në kuadër të shoqërisë dhe shtetit të Kosovës.