Universiteti “Isa Boletini” në Mitrovicë (UIBM) do të bashkëpunojë me Kompaninë Regjionale të Mbeturinave “Uniteti” Sh.A, në çështje me interes reciprok. Për të përcaktuar qëllimet dhe fushat e bashkëpunimit, të premten u nënshkrua edhe një Marrëveshje Bashkëpunimi nga rektorja e UIBM, prof.dr. Nurten Deva dhe Kryeshefi Ekzekutiv i “Uniteti” Sh.A, Ylber Murtezaj.

Qëllimi i kësaj Marrëveshjeje është të vendosë dhe zhvillojë një bashkëpunim të ndërsjellë mes UIBM dhe Kompanisë “Uniteti”, duke përmbushur objektivat si në vijim: Organizimi i aktiviteteve për ngritjen e vetëdijes mbi menaxhimin e mbeturinave në nivelin universitar dhe lokal, Lehtësimi i praktikave profesionale për studentët e UIBM në fushën e menaxhimit të mbeturinave si dhe Zhvillimi i projekteve të përbashkëta shkencore dhe studimore për mbrojtjen e mjedisit.

Ndërsa si pika konkrete bashkëpunimi janë paraparë edukimi dhe trajnimi, ku përfshihen organizime të seminareve, punëtorive dhe fushatave edukuese mbi riciklimin dhe menaxhimin e mbeturinave. Një fushë tjetër me rëndësi paraqet organizimi i praktikave profesionale, ku bën pjesë lejimi i studentëve të UIBM që të zhvillojnë praktikë profesionale në kompani. Një tjetër fushë është cekur edhe  hartimi i projekteve të përbashkëta që mbështesin zhvillimin e qëndrueshëm dhe përmirësimin e infrastrukturës së menaxhimit të mbeturinave.

Rektorja Deva, vlerësoi se kjo marrëveshje hap  mundësi si për UIBM ashtu edhe kompaninë
“Uniteti”, duke pasur parasysh edhe natyrën e programeve teknike që ka Universiteti, duke përfshirë edhe programin e mjedisit. Një marrëveshje të mirë dhe me interes reciprok e  ka vlerësuar edhe Kryeshefi Ekzekutiv i Kompanisë “Uniteti”, Ylber Murtezaj, i cili falënderoi drejtuesit e UIBM për qasjen korrekte dhe gatishmërinë për bashkëpunim.