Universiteti “Isa Boletini” në Mitrovicë (UIBM) do të bashkëpunojë me Mitrovica Women Association for Human Rights (MWAHR), me qëllim të mbështetjes dhe bashkërendimit të aktiviteteve. Për të specifikuar fushat e  bashkëpunimit, të hënën u nënshkrua edhe një Memorandum Bashkëpunimi, nga rektorja e UIBM, prof.dr. Nurten Deva dhe  Vetone Veliu, drejtoreshë e MWAHR.

Në memorandum janë specifikuar fushat e bashkëpunimit që synon të promovojë përpjekjet e përbashkëta të dy institucioneve në sferën e avancimit të çështjeve me interes reciprok. Në këtë kuadër është paraparë që palët të bashkërendojnë aktivitetet për afirmimin e çështjeve aktuale në fushën e avancimit të jetës akademike dhe profesionale përmes realizimit të punës praktike në Mitrovica Women Association for Human Rights (MWAHR) për studentët e Universiteti “Isa Boletini” në Mitrovicë.

Gjithashtu janë përcaktuar edhe obligimet për palët nënshkruese. Universiteti “Isa Boletini” në Mitrovicë mbështet takimet dhe aktivitetet e stafit të organizatës me palët siç janë: zyrtarët e universitetit, studentët, të diplomuarit, dhe Qendrën për Zhvillim të Karrierës. Studentët e Universitetit “Isa Boletini” në Mitrovicë mund të marrin pjesë dhe të përfitojnë nga programet e Mitrovica Women Association for Human Rights (MWAHR).