Universiteti “Isa Boletini” në Mitrovicë (UIBM)  do të bashkëpunojë me Universitetin Europian të Tiranës (UET), në fusha të caktuara ku të dyja palët ushtrojnë aktivitetet e tyre kryesore. Për të përcaktuar fushat dhe mënyrat e bashkëpunimit ndërmjet këtyre dy institucioneve të arsimit të lartë, të martën u nënshkrua edhe një Memorandum Bashkëpunimi nga rektori i UIBM, prof.dr. Alush Musaj dhe rektori i UET, prof.dr. Tonin Gjuraj.

Sipas Memorandumit të Bashkëpunimit, pikat kryesore ku do të fokusohet bashkëpunimi do të jenë: Kualifikimi i specializimeve, konsulenca, praktika profesionale dhe mbështetja për punësim, projektet studimore si dhe partneritete në projekte të ndryshme.  Sa i përket të drejtave dhe obligimeve, institucionet marrin përsipër që në përputhje me interesat institucionale, mundësitë e tyre dhe kapacitetet përkatëse, të vendosin në dispozicion të njëra-tjetrës të gjitha burimet njerëzore dhe materiale për arritjen e qëllimeve që parashikon Memorandumi i Bashkëpunimit.

Për implementimin e këtij Memorandumi ndërmjet UIBM dhe UET janë caktuar edhe personat përgjegjës. Nga UIBM është caktuar, prof.asoc.dr. Islam Qerimi, dekan i Fakultetit Juridik, ndërsa nga UET, prof. asoc. dr. Juelda Lamçe, dekane e Fakultetit të Shkencave Juridike, Politike dhe Marrëdhënieve Ndërkombëtare.