Më datë 14 prill 2025, Fakulteti Ekonomik në kuadër të Universitetit “Isa Boletini” në Mitrovicë ka nënshkruar një Marrëveshje Bashkëpunimi me kompaninë TRUST Real Estate SH.P.K. Ceremonia e nënshkrimit u zhvillua në ambientet e Fakultetit Ekonomik, ku institucionin arsimor e përfaqësuan Prof. Dr. Esat Durguti, Prof. Asoc. Dr. Ajetene Avdullahi dhe Prof. Ass. Dr. Filloreta Kunoviku-Demiri, ndërsa nga ana e kompanisë TRUST Real Estate SH.P.K., ishin të pranishme znj. Blerta Rafuna-Koci, Themeluese dhe znj. Albina Istrefi, Koordinatore & Menaxhere Margetingu dhe Shitjes.

Qëllimi i kësaj marrëveshjeje është shumëdimensional dhe synon të sjellë përfitime të ndërsjella për të dy palët. Marrëveshja parasheh organizimin e praktikave profesionale për studentët, realizimin e vizitave studimore, mbajtjen e ligjëratave nga profesionistë të fushës në formën e “Guest Speaker”, si dhe angazhimin e përfaqësuesve të kompanisë në trupat këshillues të Fakultetit Ekonomik. Përveç këtyre, marrëveshja përfshin edhe bashkëpunimin në fusha të tjera të rëndësishme, siç është hulumtimi i përbashkët ndërmjet stafit akademik dhe studentët të Fakultetit si dhe stafit profesional të TRUST Real Estate SH.P.K. Gjatë fjalimeve përshëndetëse, përfaqësuesit e të dy institucioneve theksuan rëndësinë e këtij bashkëpunimi si një hap i rëndësishëm drejt forcimit të lidhjes ndërmjet akademisë dhe industrisë, duke kontribuar në zhvillimin e një kulture bashkëkohore të bashkëpunimit institucional.