Fakulteti i Gjeoshkencave në Universitetin “Isa Boletini” në Mitrovicë ka pranuar një donacion të rëndësishëm librash nga prof.dr. Bajram Shabani, një kontribuues i shquar në fushën e xehetarisë dhe një mbështetës i vazhdueshëm i arsimit dhe shkencës. Dy librat universitarë, të cilët janë rezultat i punës dhe përkushtimit shkencor të prof. dr. Shabanit, do të jenë një burim i vlefshëm akademik për studentët dhe stafin e Fakultetit të Gjeoshkencave, duke ndihmuar në avancimin e dijeve dhe studimeve në këtë fushë.

Në shenjë mirënjohjeje për kontributin e tij të çmuar në arsim dhe për këtë dhuratë të vyer, dekani i Fakultetit të Gjeoshkencave, prof.assoc.dr. Festim Kutllovci, i dhuroi një hartë të Republikës së Kosovës, e cila paraqet të gjitha mineralet që vendi ynë posedon. “Kjo dhuratë simbolike është një shenjë respekti dhe vlerësimi për rolin e tij të rëndësishëm në zhvillimin e shkencës dhe edukimit në Kosovë”.

Dekani Kutllovci, shprehu falënderimet më të sinqerta për këtë fond librash që kontribuon në rritjen e cilësisë akademike, duke e pasuruar literaturën dhe mundësitë e studimit për studentët e tij.