Prof. Dr. hab. Marta Witkowska, për stafin akademik të Fakultetit Juridik, organizon një punëtori me temë: “Publikimi pa pagesë i artikujve shkencorë në revista të databazës Scopus dhe Web of Science.”
Falë realizimit të Memorandumit të Bashkëpunimit ndërmjet Fakultetit të Drejtësisë të UIBM-së dhe Fakultetit të Shkencave Politike dhe Marrëdhënieve Ndërkombëtare të Universitetit të Varshavës, nën nënshkrimin e dekanëve Prof. Dr. Islam Qerimi dhe Prof. Dr. hab. Daniel Przastek, Fakulteti Juridik ka nderin që në vitin akademik 2024 – 2025, po pretë Prof. Dr. hab. Marta Witkowska si Visiting Professor. Profesoresha nga Universiteti i Varshavës po kontribuon dhe po merr pjesë në një sërë aktivitetesh të shumta që po organizohen në këtë Fakultet.
Këtë herë, ajo ka vendosur të organizojë një punëtori për stafin akademik të Fakultetit të Drejtësisë, me një fokus të veçantë në sfidat që paraqiten gjatë botimit të artikujve shkencorë. Qëllimi i kësaj punëtorie është të ofrojë mundësinë e përfitimit nga përvoja e profesoreshës Witkowska në botimin e artikujve shkencorë në revista me faktor ndikimi. Ky aktivitet është edhe më i rëndësishëm, duke pasur parasysh se tregu i botimeve është jashtëzakonisht i pasur dhe navigimi në të mund të jetë sfidues, duke e bërë të vështirë gjetjen e revistës të duhur dhe pa pagesë.
Aktiviteti do të zhvillohet më 10 shkurt 2025, në ora 11:00, në sallën e Këshillit të Fakultetit Juridik.
