Studentët që kanë diplomuar në programet teknike të Universitetit të Mitrovicës “Isa Boletini” (UMIB),  por edhe të universiteteve tjera publike në Kosovë, do të mund të angazhohen për 6 muaj në punë praktike me pagesë. Ky projekt do të realizohet në bashkëpunim nga Agjencia e Punësimit të Republikës së Kosovës, GIZ-it dhe tri universiteteve publike, ndërmjet tyre edhe UMIB-i.

Për këtë qëllim të premten në selinë e GIZ-it në Prishtinë, u nënshkruan edhe nga një marrëveshje mirëkuptimi ndërmjet drejtuesve të këtyre organizatave dhe tre universiteteve publike, ku përveç UMIB-it bëjnë pjesë edhe Universiteti i Prishtinës dhe Universiteti i Shkencave të Aplikuara në Ferizaj.  Drejtuesit e Agjencisë së Punësimit dhe ata të GIZ-it e kanë vlerësuar si një projekt që do t’i ofroj ata që kanë diplomuar me tregun e punës.

Ndërsa rektori i UMIB-it, Alush Musaj, tha se mbështetja për të diplomuarit në fakultetet teknike, është një lajm i mirë, jo vetëm për ata që do të përfitojnë drejtpërdrejtë nga ky projekt, por gjithsesi edhe  për vetë Universitetin e Mitrovicës dhe biznesin. “Përvoja që do të përfitojnë ata që do të angazhohen në kuadër të këtij projekti, padyshim se do t’i ofroj me tregun e punës. Tek e fundit ky është qëllimi final dhe më i rëndësishëm i vetë projektit”.

Sipas tij, industria e rëndë që ka funksionuar dikur, jo vetëm në Mitrovicë, është mbajtur dhe udhëhequr nga kuadro që kanë dalur nga këto fakultete. “Rrethanat tashmë kanë ndryshuar, por ajo që ka mbetur e njëjtë është nevoja për kuadro të kësaj natyre.  Ringjallja e kësaj industrie nuk mund të paramendohet pa këto kuadro”, tha ai.

Rektori Musaj, tha se puna praktike padyshim se është një mundësi tepër e mirë për të diplomuarit dhe për këtë falënderoi Agjencinë e  Punësimit të Republikës së Kosovës dhe GIZ-it. “Gjithashtu dua të shfrytëzoj rastin që të falënderoj drejtuesit e GIZ-it edhe për mbështetje sa i përket organizimit të Panairit të Parë për Punë dhe Karrierë në Universitetin tonë, që ishte një aktivitetet tepër atraktiv dhe me rëndësi për studentët dhe biznesin e rajonit të Mitrovicës”.

Ndryshe në bazë të projektit, parashihet që studentët që kanë diplomuar në programet teknike të paraqiten në Zyret e Punësimit, ku do të njoftohen me të gjitha detajet.

Te drejte ne aplikim  kane te gjithë te diplomuarit ne këto fakultete ( kjo vlen edhe për ata te diplomuar qe banimi i tyre është ne Regjione tjera, qe kane  diplomuar ne  fakultetet teknike te sipërpërmendura.

 Thirrja është e hapur nga sot me 17 janar 2020 deri më 07 shkurt 2020.

Thirrja për aplikim