Kjo figurë e vajzës me sy të mbyllur, peshores dhe shpates, është një paraqitje vizuale e Drejtësisë, të cilën e ka pikturuar studentja e dalluar e Fakultetit Juridik, Liridona Hyseni.

Kjo pikturë simbolizon konceptet themelore të sistemit juridik dhe të drejtësisë. Ky simbol është shpesh i njohur dhe i lidhur me figurën e Drejtësisë si një personifikim.

Për t’i dhënë një kuptim më të detajuar figurës së Drejtësisë duhet shprehur se:

• Vajza me sy të mbyllur është simbol i paanshmërisë dhe objektivitetit të drejtësisë. Ajo tregon se drejtësia nuk është e ndikuar nga emocione, paragjykime ose interesa të jashtme, dhe se ajo gjykon në mënyrë të barabartë dhe të drejtë pa marrë parasysh pamjen e jashtme të individëve ose rrethanat e tyre.
• Peshorja është një simbol i barazisë dhe balancës. Ajo tregon se drejtësia është një proces që vlerëson dhe merr parasysh të gjitha faktet dhe argumentet në mënyrë të barabartë, duke vendosur një ekuilibër mes interesave të ndryshme.
• Shpata është një simbol i fuqisë dhe autoritetit të ligjit dhe sistemit juridik. Ajo mund të nënkuptojë aftësinë e sistemit të drejtësisë për të zbatuar vendimet dhe ndëshkimet e nevojshme për të mbrojtur rendin dhe drejtësinë.

Për pikturën e simbolit të Drejtësisë, të realizuar  dhe dhuruar nga Liridona Hyseni, studente e dalluar e Fakultetit Juridik, dekani i Fakultetit Juridik, Prof. Dr. Islam Qerimi, shprehu falënderimet për studentën, e cila ka demonstruar edhe më parë talentin e saj, siç është pikturimi i figurave të rëndësishme historike, si në rastin e heroit kombëtar Isa Boletini, emrin e të cilit e mban me krenari Universiteti publik i Mitrovicës, dhe është vendos në Zyrën e Dekanit.

Prof. Dr. Qerimi theksoi se piktura e simbolit të drejtësisë nga Liridona, mund të ketë krijuar një shenjë për të përfaqësuar një ide të thellë mbi drejtësinë, e cila është e lidhur ngushtë me konceptet e paanshmërisë, barazisë, dhe forcës në fushën juridike. Ai shtoi se piktura ka për qëllim të përçojë vizualisht rëndësinë e këtyre vlerave në sistemin e drejtësisë. Ky simbol duhet të shërbejë si një kujtesë për të gjithë ata që studiojnë dhe ushtrojnë profesionin e juristit se drejtësia duhet të jetë e paanshme, e balancuar dhe me autoritet të fortë, për të siguruar një shoqëri të drejtë.