Universiteti “Isa Boletini” në Mitrovicë (UIBM) ka kaluar nga anëtar vëzhgues në anëtar të asocuar në Agjencinë Universitare Frankofone (AUF). Si rrjedhojë tash e tutje UIBM ka të drejtë për votë këshilluese në Ansamblenë e Përgjithshme të AUF.

Në njoftimin e AUF për këtë avancim të statusit të UIBM në këtë organizatë, gjithashtu shprehet besimi për forcimin e bashkëpunimit të mëtejmë. Po ashtu drejtuesit e AUF falënderojnë ata të UIBM për besimin e treguar sa i përket bashkëpunimit.

Rektori i UIBM, prof.dr. Alush Musaj, ka shprehur kënaqësinë e tij për këtë lajm të mirë nga AUF. Ai gjithashtu është shprehur mirënjohës për gatishmërinë dhe qasjen bashkëpunuese nga AUF.