Në kuadër të objektivave të Universitetit “Isa Boletini” në Mitrovicë për rritjen e numrit të bashkëpunimeve me institucione të arsimit të lartë, Rektori i UIBM-së Prof.Dr. Alush Musaj ka lidhur marrëveshje bashkëpunimi me Rektoren Prof.Dr. Mariana Ivanova e University of Agribusiness and Rural Development nga Plovdiv, Bullgari.

UIBM dhe UARD përmes marrëveshjes së nënshkruar kanë rënë dakord për objektivat dhe aktivitetet e mëposhtme:

• Shkëmbim ndërmjet institucioneve të:
• Stafit akademik për qëllime të nxitjes së bashkëpunimeve kërkimore në lidhje me planet dhe programet arsimore;
• Stafit akademik për qëllime të shkëmbimit të ekspertizës mësimore;
• Stafit akademik për qëllime të ligjëratave/vizitave afatshkurtra;
• Stafit administrativ me qëllim të transferimit të njohurive të praktikave administrative veçanërisht në fushën e Ekonomisë, Marketingut, Menaxhimit, Turizmit, Financave, Bankave, Ekologjisë, Mbrojtjes së Mjedisit, Teknologjisë së Informacionit etj.
• Studentëve në programet “studim jashtë vendit” dhe/ose “shkëmbim studentësh”;
• Studentëve pasuniversitarë që ndjekin programe kërkimore, të cilët do të përfitojnë nga aksesi në ekspertizën ose burimet e disponueshme në institucionin pritës;
• Botimi i artikujve shkencorë dhe artikujve të tjerë të lidhur në revista dhe botime të specializuara;
• Ofrimi i shërbimeve informuese nga secili institucion për vizitorët nga institucioni tjetër;
• Shkëmbimin e informacionit dhe materialeve që janë me interes të përbashkët;
• Bashkëpunimi në sferën e trajnimit profesional dhe konsulencës;
• Bashkëpunimi në sferën e organizimit të konferencave shkencore;
• Bashkëpunimi në sferat e fushave të ndryshme të kërkimit (strategji, projekte, programe etj.);
• Forma të tjera bashkëpunimi të cilat institucionet mund t’i rregullojnë së bashku.

E gjithë kjo me qëllim të ngritjes së bashkëpunimit në fushat e ndryshme që janë në interes së zhvillimit të institucioneve gjegjëse.