Për të shtatin vit me radhë nuk ka të gjetura dhe rekomandime nga auditori për Universitetin “Isa Boletini” në Mitrovicë (UIBM).  Kjo është konfirmuar nga raporti i Zyrës Kombëtare të Auditimit për pasqyrat financiare vjetore (2023) për Ministrinë e Arsimit Shkencës, Teknologjisë dhe Inovacionit (MASHTI), gjegjësisht për nënprogramet që funksionojnë në kuadër të kësaj ministrie, pjesë e të cilës është edhe UIBM.

Lajmin e ka mirëpritur rektorja e UIBM, prof.dr. Nurten Deva, e cila vlerësoi profesionalizmin dhe përkushtimin e stafit administrativ. “Me këtë rast dua t’i përgëzoj fillimisht drejtuesit dhe zyrtarët e Drejtorisë për Buxhet dhe Financa si dhe gjithë mekanizmat e UIBM për punën e tyre profesionale”, tha ajo.

Sekretari i përgjithshëm, Avdyl Beqiri, tha se tashmë është krijuar një traditë e menaxhimit të mirë financiar në këtë institucion, ndërsa u.d. drejtori për Buxhet dhe Financa, Burim Hasani, theksoi se procesi i auditimit në UIBM është kryer në përputhje me Standardet Ndërkombëtare të Institucioneve Supreme të Auditimit (SNISA) dhe auditori nuk ka të gjetura dhe rekomandime për UMIB-in.

Hasani, i cili është edhe koordinator për çështje audituese në UIBM, sqaroi se sipas këtyre standardeve është prezantuar dhe kontrolluar dokumentacioni i kërkuar duke dhënë mundësinë e konsultimeve të përgjegjësve që mbulojnë fushat që ishin objekt i kontrollit. “Dosjet e kërkuara ishin të mjaftueshme që auditori i përgjithshëm të jep opinion profesional lidhur me menaxhimin financiar”, tha ai.