umib

Musa Dibrani – një karrierë e pasur që ka nisur në UIBM
Musa Dibrani ka përfunduar studimet baçelor në vitin 2011 në Fakultetin e Gjeoshkencave dhe
Teknologjisë, drejtimi Inxhinieri Ushqimore, në Universitetin “Isa Boletini” në Mitrovicë.
Rrugëtimin akademik e ka vazhduar në nivelin master, të cilin e ka përfunduar në vitin 2013,
duke u specializuar më tej në fushën e inxhinierisë ushqimore.
Formimi i fituar gjatë studimeve në UIBM i ka hapur rrugë një karriere të pasur dhe të
larmishme në institucione të rëndësishme publike dhe arsimore. Musa është angazhuar në
Komunën e Mitrovicës, në Agjencinë e Ushqimit dhe Veterinarisë në Prishtinë, si dhe në
Ministrinë e Shëndetësisë, duke dhënë kontribut të çmuar në fushën e sigurisë ushqimore dhe
shëndetit publik. Krahas angazhimeve në sektorin publik, ai ka kontribuar edhe në edukimin
profesional si pjesë e Shkollës Profesionale për Përgatitjen e Kuadrit për Kuzhinier, pranë
organizatës Diakonia Mitrovicë.
Ky rrugëtim pasqyron përkushtimin, profesionalizmin dhe dijen e fituar gjatë studimeve në
Universitetin “Isa Boletini” në Mitrovicë, të cilat kanë qenë themeli i një karriere të
qëndrueshme dhe me ndikim të gjerë në shoqëri.
Musa Dibrani rekomandon të rinjtë që të zgjedhin Fakultetin e Teknologjisë Ushqimore në
UIBM, si një mundësi të shkëlqyer për të ndërtuar një të ardhme profesionale të suksesshme dhe
për të kontribuar në zhvillimin e vendit.

Fjolla Lasku Hoti – një udhëtim i suksesshëm në fushën e Mjedisit

Fjolla Lasku Hoti ka përfunduar studimet master në Fakultetin e Teknologjisë Ushqimore, drejtimi Inxhinieri e Mbrojtjes së Mjedisit në Universitetin “Isa Boletini” në Mitrovicë. Gjatë studimeve, ajo ka fituar njohuri të thelluara në fusha kyçe të inxhinierisë mjedisore, përfshirë trajtimin e ujërave të ndotura dhe industriale, cilësinë e ujit dhe ajrit, energjinë alternative, tokën, menaxhimin e mbetjeve të rrezikshme dhe proceset e riciklimit.

Aktualisht, Fjolla është e punësuar në Kompaninë Rajonale të Ujësjellësit “Gjakova”, ku mban pozitën e Shefes së Impiantit për Trajtimin e Ujërave të Ndotura Urbane. Ajo ka qenë pjesë e projekteve që adresojnë sfida reale mjedisore në Kosovë, duke kontribuar me zgjidhje të qëndrueshme dhe inovative. Përvoja e saj akademike është pasuruar edhe me bursën Erasmus+, gjatë së cilës ka ndjekur një semestër në Universitetin Van Hall Larenstein në Holandë, ku ka kombinuar studimet teorike me praktikën profesionale në trajtimin e ujërave të ndotura, duke fituar përvojë ndërkombëtare dhe duke krijuar lidhje të vlefshme profesionale.

Së fundmi, falë formimit të gjerë akademik dhe profesional, Fjolla është pranuar për të ndjekur studimet e doktoratës në Universitetin e Burimeve Natyrore dhe Shkencave të Jetës (BOKU) në Vjenë të Austrisë – një hap i rëndësishëm drejt avancimit të saj në fushën e kërkimit dhe inovacionit mjedisor.

Fjolla thekson se përvoja në Universitetin “Isa Boletini” në Mitrovicë ka qenë vendimtare në rrugëtimin e saj profesional dhe ka luajtur një rol të rëndësishëm në hapjen e mundësive të reja jo vetëm në Kosovë por edhe në nivel ndërkombëtar.

Eroll Zeka – Rrugëtim i suksesshëm në industrinë ushqimore dhe përtej

Eroll Zeka ka përfunduar studimet master në Fakultetin e Teknologjisë Ushqimore dhe Inxhinierisë Ushqimore në Universitetin “Isa Boletini” në Mitrovicë, në vitin 2022. Formimi akademik në këtë drejtim i ka shërbyer si bazë e fortë për zhvillimin e një karriere dinamike dhe të larmishme në fusha të ndryshme profesionale.

Pas përfundimit të studimeve, Erolli ka fituar përvoja të shumta kryesisht në industrinë e prodhimit dhe përpunimit të produkteve ushqimore. Ai ka punuar si teknolog ushqimor në fabrikën e prodhimit të produkteve konditorike të kompanisë “Sedefi Commerce”; si përgjegjës për cilësinë e produkteve ushqimore në zinxhirin e restoranteve “Burger King”; si inspektor dhe auditor në prodhimtarinë organike ushqimore për kompaninë “Organska Kontrolla” nga Sarajeva; si dhe si menaxher i cilësisë në kompaninë “Fresh-Co”, e cila merret me prodhimin e produkteve higjienike, shamponave dhe pelenave.

Përveç angazhimeve profesionale, Erolli ka ndërmarrë edhe nisma personale duke themeluar në pronësinë e tij distilerinë “EZI Distillery”, ku prodhon pije alkoolike (raki) dhe lëngje joalkoolike organike. Ky hap tregon shpirtin e tij ndërmarrës dhe përkushtimin për të sjellë risi në treg.

Aktualisht, ai është i angazhuar në kompaninë “Comodita Home”, në Departamentin e Laboratorit dhe Kontrollit të Cilësisë, ku vazhdon të kontribuojë me ekspertizën e tij në fushën e cilësisë dhe standardeve të prodhimit.

Historia e suksesit të Eroll Zekës është dëshmi se formimi i marrë në Universitetin “Isa Boletini” në Mitrovicë, i kombinuar me përvojën praktike dhe angazhimin e vazhdueshëm, krijon mundësi të shumta për zhvillim profesional brenda dhe jashtë fushës së industrisë ushqimore.

Festona Hajrizi një Teknologe Ushqimore e suksesëshme.

Festona Hajrizi në muajin qershor 2025 përfundoi studimet bachelor në Fakultetin e Teknologjisë Ushqimore, drejtimi Inxhinieri dhe Teknologji Ushqimore në Universitetin “Isa Boletini” në Mitrovicë. Aktualisht ajo po ndjek studimet në vitin e parë të masterit në të njëjtin drejtim dhe është punësuar si teknologe në kompaninë GoldenMix në Mitrovicë, që është pjesë e Jaffa Food and Sweets, një nga kompanitë kryesore në Kosovë në fushën e prodhimit të ushqimit.

Ky angazhim profesional i Festonës dëshmon se përkushtimi dhe aftësitë e fituara gjatë studimeve janë çelës i suksesit dhe hapin rrugë për të ardhmen në sektorin e industrisë ushqimore.
Festona falënderon Universitetin “Isa Boletini” në Mitrovicë për mbështetjen dhe mundësitë e krijuara gjatë studimeve, dhe rekomandon të rinjtë që të vazhdojnë studimet në Fakultetin e Teknologjisë Ushqimore në UIBM.

Merita Fazlija – Një rrugëtim drejt suksesit profesional

Merita Fazlija ka përfunduar studimet Master në vitin 2024, në drejtimin Inxhinieri dhe Teknologji Ushqimore, pranë Fakultetit të Teknologjisë Ushqimore, Universiteti “Isa Boletini” në Mitrovicë.

Gjatë rrugëtimit të saj profesional, një përvojë e veçantë ka qenë angazhimi në fabrikën e përpunimit të mishit të rosave Weng Fat Poultry, ku ka fituar njohuri të vlefshme mbi sistemet e punës dhe standardet e larta ushqimore. Këtë përvojë, Merita e cilëson si të paharruar dhe të vyer për formimin e saj profesional.

Aktualisht, ajo punon si Laborante në Qumështoren Drena në Skenderaj, ku ka mundësinë të shpalosë dhe të zbatojë dijen e fituar gjatë studimeve. Ky angazhim përbën një sfidë të re, por edhe një mundësi për të avancuar më tej në fushën e teknologjisë ushqimore.

Në përmbyllje të këtij rrugëtimi, Merita shpreh mirënjohje të veçantë për stafin akademik të Fakultetit të Teknologjisë Ushqimore, për përkushtimin dhe mbështetjen e tyre gjatë viteve të studimeve, duke theksuar se ky formim ka qenë baza kryesore e suksesit të saj.

MSc. Erdina Xheloshi – një udhëtim i suksesshëm në fushën e Teknologjisë Ushqimore

MSc. Erdina Xheloshi përfundoi studimet Master në Fakultetin e Inxhinierisë dhe Teknologjisë Ushqimore në Universitetin “Isa Boletini” në Mitrovicë, në vitin 2024. Storia e saj e suksesit fillon me regjistrimin e studimeve bachelor në të njëjtin fakultet në vitin 2016, ku arriti rezultate të larta dhe dy herë radhazi u shpall bursiste e universitetit. Studimet bachelor i përfundoi në vitin 2019, ndërsa në nivelin master vazhdoi të tregojë përkushtim dhe arritje të shkëlqyera, duke përfshirë publikimin e një punimi shkencor në bashkëpunim me prof. Dafina Llugaxhiu-Krasniqi.

Aktualisht, Erdina është e punësuar në Agjencinë e Ushqimit dhe Veterinarisë – Zyra Rajonale Mitrovicë, ku mban pozicionin e Inspektores. Përvoja e saj profesionale dhe akademike ka kontribuar në zhvillimin e aftësive të specializuara në fushën e sigurisë ushqimore dhe mbikëqyrjes së standardeve të shëndetit publik.

Erdina shpreh mirënjohje ndaj Universitetit “Isa Boletini” në Mitrovicë për mundësitë e dhëna gjatë studimeve, duke e konsideruar një bazë të fortë për arritjet profesionale dhe motivim për të rinjtë që të ndjekin rrugën e saj në Fakultetin e Teknologjisë Ushqimore.

Valdrin Beluli – Nga UIBM drejt suksesit profesional në Gjermani

Valdrin Beluli ka përfunduar studimet bachelor në Fakultetin e Teknologjisë Ushqimore, Departamenti i Teknologjisë, në Universitetin “Isa Boletini” të Mitrovicës gjatë viteve 2014–2017, në drejtimin Inxhinieri dhe Teknologji Ushqimore. Pas përfundimit të këtij cikli studimesh, ai vazhdoi studimet master në Fakultetin e Shkencave të Natyrës, Departamenti i Kimisë Industriale, në Universitetin e Tiranës (2018–2020), ku u specializua në Inxhinierinë e Proceseve Kimike.

Aktualisht, Valdrini është i angazhuar si Inxhinier i servisimit dhe prodhimit në Gjermaninë Federale, në sektorin e filtrave me presim kimikë, ushqimorë dhe mjedisorë, (kapacitete të ulëta ashtu edhe të larta). Krahas punës, ai është i përfshirë aktivisht në kërkime dhe zhvillim shkencor, duke kontribuar në industri të ndryshme me zgjidhje inovative dhe metoda bashkëkohore optimizimi për uljen e kostove të operimit dhe prodhimit.

Rrugëtimi i tij profesional përfshin një numër të madh arritjesh, si: prezantimi dhe publikimi i rreth 20 punimeve dhe hulumtimeve në vende të ndryshme si Shqipëri, Poloni, Kroaci dhe Turqi; pjesëmarrja në 5 konferenca ndërkombëtare dhe 1 kombëtare; si dhe përvoja si hulumtues dhe zhvillues shkencor, supervizor laboratori dhe i cilësisë. Gjithashtu, Valdrini ka përfunduar certifikimin profesional në Python (Python Institute – Infotech Academy, Gjilan, 2023–2024), duke e zgjeruar më tej profilin e tij profesional.

Ai është anëtar i disa prej shoqatave më prestigjioze shkencore në Evropë, përfshirë Swiss Chemical Society (SCS), Swiss Society of Chemical & Process Engineering (SGVC), German Chemical Society (GDCh) si dhe rrjetin ndërkombëtar të kimistëve të rinj pranë IUPAC (IYCN). Për kontributin dhe angazhimin e tij, Valdrini ka qenë pesë herë bursist në nivel kombëtar.

Historia e suksesit të tij është një dëshmi e fuqishme se përkushtimi akademik dhe profesional hapin rrugën drejt arritjeve të mëdha. Përvoja në Universitetin “Isa Boletini” në Mitrovicë ka qenë një bazë e fortë për karrierën e tij, dhe sot Valdrini shërben si shembull frymëzues për studentët e rinj që duan të ndërtojnë një të ardhme në fushën e shkencës, teknologjisë dhe industrisë ushqimore.

Alumnus i Fakultetit të Inxhinierisë Mekanike dhe Kompjuterike – UIBM

Unë jam Mergim Grajçevci, i diplomuar në programin Bachelor i Shkencave në Makineri Prodhuese në Fakultetit të Inxhinierisë Mekanike dhe Kompjuterike  në Universitetin “Isa Boletini” në Mitrovicë. Ende pa përfunduar studimet në drejtimin Makineri Prodhuese në FIMK, kam gjetur punë në një nga institucionet më të rëndësishme energjetike në vend – KEK. Aktualisht punoj si Teknik i Makinerisë në Korporatën Energjetike të Kosovës (KEK).

Në punën time të përditshme jam përgjegjës për mbikëqyrjen e performancës së makinerive, mirëmbajtjen parandaluese dhe riparimin e pajisjeve të dëmtuara. Për këtë, përgatitja teknike që kam marrë në Fakultetit të Inxhinierisë Mekanike dhe Kompjuterike – UIBM ka qenë thelbësore.

Studimet në UIBM kanë ndikuar në mënyrë vendimtare në zhvillimin tim profesional. Kam fituar njohuri të thella teorike, por mbi të gjitha edhe përvojë praktike reale. Një nga anët më të mira të programit ishte njohja me një gamë të gjerë softuerësh inxhinierikë si:
AutoCAD, SolidWorks, SolidCAM, Inventor, Fusion 360, CATIA, ANSYS, MathCAD dhe të tjerë.
Puna me këta softuerë më ka ndihmuar të zhvilloj aftësi në dizajnin mekanik, analizën e elementeve të fundme (FEA), përgatitjen për prodhim dhe simulimet inxhinierike – aftësi që sot i zbatoj çdo ditë në punën time.

Ndër përvojat më të mira gjatë studimeve përmend:

• Pjesëmarrjen në projekte studentore,
• Praktikën në punëtorinë e fakultetit,
• Kontaktin e vazhdueshëm me profesorët,
• si dhe ambientet moderne të universitetit që krijojnë kushte ideale për mësim dhe zhvillim.

Edhe pse nuk kam pasur përvoja ndërkombëtare, përgatitja ime në Fakultetit të Inxhinierisë Mekanike dhe Kompjuterike më ka dhënë sigurinë dhe kompetencat për të ndërtuar një karrierë të qëndrueshme në Kosovë.

Këshilla ime për studentët aktualë dhe ata që mendojnë të zgjedhin FIMK në UIBM është kjo:

Përqendrohuni në mësim dhe zhvillim personal. Shfrytëzoni maksimalisht mundësitë që ofron universiteti – veçanërisht pajisjet laboratorike, praktikat dhe softuerët profesionalë. Mos hezitoni të kërkoni ndihmën dhe përkrahjen e profesorëve, të cilët janë gjithmonë të gatshëm t’ju mbështesin drejt suksesit profesional.