Këshilli Organizativ për Konferencën Ndërkombëtare Multidiciplinare për Gjeoshkencë (IMGC2022) në Universitetin “Isa Boletini” në Mitrovicë (UIBM), në mbledhjen e mbajtur më 7 mars 2022 në UIBM, vendosi që edicioni i katërt i kësaj konference të mbahet më 13 dh 14 tetor 2022. Këshilli Organizativ, përveç përfaqësuesve nga Fakulteti i Gjeoshkencave në UIBM, ku kryesues është profesori Sabri Avdullahi, ka në përbërje: Gani Kastratin e Gani Maliqin nga Komisioni i Pavarur për Miniera dhe Minerale (KPMM), Luan Morinën nga Shërbimi Gjeologjik i Kosovës dhe Skender Sallahun nga Departamenti i Minierave në Ministrinë  Ekonomisë.

Të pranishëm në mbledhjen e parë të KO ishin edhe rektori i UIBM, prof.dr. Alush Musaj dhe prorektorët. Musaj vlerësoi punën e mirë që është bërë në kuadër të kësaj konference në tri edicionet e mëparshme dhe shprehu besimin për suksesin e saj edhe në edicionin e katërt.

Ai ofroi mbështetjen e plotë të UIBM sa i përket organizimit dhe aspekteve të tjera që ndërlidhen me këtë konferencë. “Jam shumë mirënjohës për krejt ata që kanë qenë pjesë e organizmit dhe pjesëmarrësit në tri edicionet  e para dhe po ashtu edhe për ju që sot jeni pjesë e këtij projekti shkencor, që tejkalon kufijtë e universitetit tonë”, tha ai.

Të pranishmit kanë shprehur gatishmërinë për të kontribuuar që organizimi i edicionit të katërt të shkojë sa më mirë.