Universiteti “Isa Boletini” në Mitrovicë ka nënshkruar marrëveshje me organizatën CRDF Global për promovimin dhe ofrimin pa pagesë të kursit online për higjienën kibernetike (Cyber Hygiene). Marrëveshja u mundëson studentëve të të gjitha fakulteteve të ndjekin kursin, i cili përfshin rregullat themelore të sigurisë së informacionit dhe në fund të pajisen me certifikatë.

Ky projekt realizohet me mbështetjen e Departamentit të Shtetit Amerikan, kurse platforma për ofrimin e kursit është zhvilluar nga CRDF Global. Udhëheqës i projektit në Universitetin “Isa Boletini” në Mitrovicë është caktuar profesori, Berat Ujkani.

Marrëveshja për ofrimin e kursit vjen pas nënshkrimit të memorandumit të mirëkuptimit në mes të Universitetit dhe CRDF Global, në muajin prill të këtij viti.