Zyrtarë të Shërbimit për Shkëmbime Akademike Gjermane (DAAD), kanë mbajtur të mërkurën një sesion informues në Universitetin “Isa Boletini” në Mitrovicë, ku kanë prezantuar mundësitë e studimeve në universitetet gjermane. Të pranishëm në këtë sesion ishin mësimdhënës, zyrtarë të administratës dhe studentë.

Paraprakisht, delegacionin nga  Ambasada Gjermane në Prishtinë, të udhëhequr nga Christian Böttcher, e ka pritur u.d. rektorja e UIBM, prof.dr. Nurten Deva e shoqëruar nga dekani i Fakultetit Juridik, prof.asoc.dr. Islam Qerimi. Në takim u bisedua për mundësitë që ofron DAAD për studentët dhe mësimdhënësit që duan të studiojnë në universitetet gjermane.

Gjithashtu u shqyrtuan edhe mundësitë e bashkëpunimit të vazhdueshëm me UIBM. U.d. rektorja Deva, i falënderoi përfaqësuesit e ambasadës gjermane për mundësitë e ofruara dhe gatishmërinë e vendosjes së një bashkëpunimi të rregullt nëpërmjet një marrëveshjeje bashkëpunimi.