Më 05.06.2024, studentët e vitit të dytë nga Fakulteti i Edukimit të Universitetit “Isa Boletini” në Mitrovicë, të shoqëruar nga profesoresha Saranda Kika Bahtiri, patën një përvojë të jashtëzakonshme gjatë vizitës së tyre në Galerinë e Ministrisë së Kulturës dhe Galerinë Kombëtare të Kosovës. Kjo vizitë u organizua me qëllim të zgjerimit të njohurive të studentëve për artin bashkëkohor dhe rëndësinë e tij në edukimin kulturor dhe artistik. Gjatë vizitës, studentët patën mundësinë të shohin nga afër disa nga veprat më të njohura të artistit të shquar Gjelosh Gjokaj. Gjokaj, i njohur për teknikat e tij të veçanta dhe interpretimet e tij të pasura të peizazheve dhe portreteve, ka lënë një gjurmë të pashlyeshme në artin bashkëkohor kosovar.

Ekspozita e Gjelosh Gjokajt na mahniti me diversitetin dhe thellësinë e veprave të tij, duke përfshirë piktura dhe grafika të fuqishme që kombinonin ngjyrat e gjalla dhe të errëta për të krijuar një efekt dramatik dhe emocional. Ndër veprat e ekspozuara, studentët u ndalën veçanërisht tek disa peizazhe që shfaqnin një mjeshtëri të jashtëzakonshme në përdorimin e dritës dhe hijes. Në Galerinë Kombëtare të Kosovës, studentët u pritën nga Naim Spahiu, koordinator i ekspozitës, dhe Vlora Hajdini, koordinatore për edukim, të cilët ofruan informacione të detajuara dhe interesante mbi ekspozitat dhe rëndësinë e tyre kulturore. Kjo vizitë edukative u vlerësua shumë nga studentët, të cilët mësuan për rëndësinë e artit në kulturën dhe historinë e Kosovës dhe u frymëzuan nga talenti dhe kreativiteti i një prej artistëve më të njohur të vendit me renome botërore.