Në një ceremoni të organizuar në Universitetin “Isa Boletini” në Mitrovicë, kanë diplomuar të premten 14 studentë të gjeneratës së parë në Fakultetin Ekonomik. Në sallën ku është organizuar mbrojtja e diplomave, përveç të tjerëve ka qenë i pranishëm edhe rektori, Alush Musaj.

Më këtë rast rektori, i ka uruar studentët dhe drejtuesit e Fakultetit Ekonomik, për një punë të mirë që kanë bërë gjatë këtyre viteve. “Niveli i punimeve që janë prezantuar na bën që ndjehemi krenar ne të gjithë edhe si familjarë, edhe si fakultet, por edhe si universitet”, tha rektori.

Të pranishmit i ka përshëndetur edhe prorektori për Çështje Mësimore, Izet Zeqiri, dekani i Fakultetit Ekonomik, Besart Hajrizi si dhe profesori Bashkim Preteni, të cilët kanë qenë në komision për studentin e parë që e ka mbrojtur temën e diplomës. Ata janë shprehur të kënaqur me të arriturat e Fakultetit Ekonomik në këtë rast dhe të Universitetit “Isa Boletini” në përgjithësi.