Një grup studentësh të Fakultetit Juridik, të shoqëruar nga dekani, prof. dr. Islam Qerimi, realizuan një vizitë studimore në Qendrën Korrektuese në Smrekonicë. Ata u pritën nga drejtori i Qendrës, z. Avni Miftari. Gjatë vizitës, studentët patën mundësinë të fitojnë njohuri praktike mbi funksionimin e institucioneve korrektuese, në kuadër të lëndëve që po ndjekin, si E Drejta Penale, E Drejta Procedurale Penale, Kriminologjia dhe Viktimologjia.

Drejtori i Qendrës Korrektuese në Smrekonicë, z. Avni Miftari, foli për misionin e institucionit që drejton, me fokus në rehabilitimin dhe riintegrimin e personave të dënuar në shoqëri në mënyrën më efektive të mundshme.

Në emër të Fakultetit Juridik, dekani Qerimi falënderoi drejtuesit e Qendrës për mikpritjen dhe mundësinë e krijuar për studentët, duke theksuar se kjo vizitë përbën një përvojë të vlefshme dhe frytdhënëse për zhvillimin e tyre profesional. Ai shprehu gjithashtu shpresën që ky bashkëpunim të vazhdojë dhe të thellohet përmes aktiviteteve të përbashkëta, si ligjërata të hapura, tryeza shkencore dhe vizita të tjera studimore.