Universiteti “Isa Boletini” në Mitrovicë (UIBM) ka pranuar një donacion të çmuar librash nga ish-profesori i njohur i këtij institucioni, Prof. Dr. Hamdi Visoka, i cili sot gëzon pensionin.

Biblioteka Universitare e UIBM ka pranuar zyrtarisht 263 tituj librash (gjithsej 263/283 ekzemplarë), të cilat përfshijnë literaturë të vlefshme shkencore, profesionale, si dhe fusha specifike të kimisë analitike, instrumentale, teknologjisë dhe fushave të ngjashme, të mbledhura ndër dekada të punës së tij të palodhshme akademike e kërkimore.

Gjatë këtij akti sublim e solemn të dhurimit të librave, prezentë ishin Dekani i Fakultetit të Teknologjisë Ushqimore (FTU), profesorë nga stafi akademik i FTU-së, si dhe përfaqësues të Bibliotekës Universitare, të cilët shprehën konsideratën më të lartë dhe e falënderuan përzemërsisht profesorin për përkushtimin dhe kontributin e tij të pashtershëm.

Ky gjest fisnik i Prof. Dr. Hamdi Visokës dëshmon përkushtimin e tij të vazhdueshëm ndaj dijes, shkencës dhe studentëve, edhe pse tashmë është në pension. Fondi i dhuruar i librave, i cili përfshin botime vendndodhjet e të cilave shtrihen nga qendra të njohura ndërkombëtare e deri te studimet autoriale të vetë profesorit (si Analiza Kimike Instrumentale dhe Metoda Instrumentale Të Analizës Kimike), do të pasurojë ndjeshëm fondin ekzistues të Bibliotekës Universitare.

“Në emër të Bibliotekës Universitare, i shprehim mirënjohjen tonë më të sinqertë Prof. Dr. Hamdi Visokës për këtë donacion të çmuar, i cili do të mbështesë fuqishëm nevojat akademike dhe kërkimore të studentëve dhe stafit tonë,” theksoi udhëheqësi i Bibliotekës së UIBM, Alban Fazliu.

Universiteti “Isa Boletini” në Mitrovicë falënderon përzemërsisht Prof. Dr. Hamdi Visokën për këtë kontribut madhështor, duke i uruar shëndet të plotë dhe jetë të gjatë në vitet e tij të pensionit.