Universiteti “Isa Boletini” në Mitrovicë (UIBM), më 11 nëntor 2026, do të organizojë një sesion informues me përfaqësuesit e Zyrës Erasmus+ në Kosovë, me qëllim të prezantimit të mundësive dhe përfitimeve që ofron programi Erasmus+ përmes thirrjes së këtij viti.

Gjatë sesionit do të prezantohen mundësitë e aplikimit dhe pjesëmarrjes në programin Erasmus+, me theks të veçantë në skemat e mobilitetit për studentë dhe staf akademik, mundësitë për bashkëpunim ndërinstitucional, si dhe format e tjera të mbështetjes që ofrohen përmes këtij programi.

Ky aktivitet synon të rrisë informimin dhe interesimin e studentëve dhe stafit akademik për mundësitë që ofron Erasmus+, si dhe të ofrojë hapësirë për diskutim, shkëmbim të informatave dhe adresim të pyetjeve lidhur me kriteret dhe procedurat e aplikimit.

Detajet e sesionit informues:

• Data: 11 nëntor 2026
• Ora: 11:00
• Vendi: Salla Solemne, Rektorati i UIBM-së

UIBM inkurajon studentët dhe stafin akademik që të marrin pjesë në këtë sesion informues dhe të shfrytëzojnë mundësinë për t’u njohur më nga afër me programin Erasmus+, i cili kontribuon në zhvillimin akademik e profesional, shkëmbimin e përvojave dhe ndërkombëtarizimin e Universitetit.

Ju mirëpresim!