Arbër Hoxha, student në Fakultetin Juridik të Universitetit “Isa Boletini” në Mitrovicë, mori pjesë në “Akademinë Rajonale për të Rinj mbi Mësimin dhe Edukimin e të Rriturve”, e cila u mbajt në Stamboll nga data 19 deri më 21 maj 2025. Kjo akademi u organizua nga DVV International (në kuadër të projektit Continental Exchange – Europe) në bashkëpunim me Shoqatën Evropiane për Edukimin e të Rriturve (EAEA), dy organizata të njohura në fushën e të nxënit dhe edukimit gjatë gjithë jetës.

Ngjarja mblodhi së bashku profesionistë të rinj nga gjashtë vende: Kosova, Moldavia, Ukraina, Bosnja dhe Hercegovina, Armenia dhe Gjeorgjia – të gjithë të angazhuar në mënyrë aktive në fushën e arsimit joformal dhe në avokimin për të drejtën e të rriturve për të mësuar.

Gjatë dy ditëve e gjysmë të këtij trajnimi intensiv, pjesëmarrësit patën mundësinë të eksplorojnë koncepte kyçe në fushën e edukimit të të rriturve, të njihen me praktika të mira ndërkombëtare dhe të krijojnë lidhje të vlefshme brenda një rrjeti profesional të gjerë.