Në kuadër të projektit Erasmus+ për Ndërtimin e Kapaciteteve në Arsimin e Lartë LEADALKO – Zhvillimi i Kapaciteteve të Lidershipit në Arsimin e Lartë në Shqipëri dhe Kosovë, u realizua me sukses pilotimi i Programit për Zhvillimin e Lidershipit (Leadership Development Programme – LDP) në datat 29–31 janar 2026, në ambientet e Kolegji Biznesi, Kosovë.

Trajnimi mblodhi përfaqësues dhe profesionistë nga Ministria e Arsimit, Shkencës, Teknologjisë dhe Inovacionit e Kosovës, Instituti Pedagogjik i Kosovës, Universiteti “Isa Boletini” në Mitrovicë dhe Kolegji Biznesi, duke krijuar një mjedis të fortë bashkëpunimi dhe mësimi ndërinstitucional.

Programi u realizua nga stafi akademik i UIBM dhe Kolegji Biznesi, dhe atë nga Prof.ass.dr. Filloreta Kunoviku Demiri dhe Prof. Atdhe Kabashi në bashkëpunim me trajnerë ndërkombëtarë, përfshirë Prof. Jan Uwic dhe Prof. David Dawson, të cilët sollën perspektiva të vlefshme ndërkombëtare mbi lidershipin, qeverisjen dhe ndryshimin institucional në arsimin e lartë.

Gjatë programit treditor, pjesëmarrësit ndoqën një paketë të plotë modulesh trajnuese të fokusuara në:

• lidershipin strategjik dhe qeverisjen në institucionet e arsimit të lartë,
• lidershipin akademik dhe vlerat institucionale,
• komunikimin efektiv dhe aftësitë drejtuese, si dhe
• hartimin, zbatimin dhe vlerësimin e projekteve të ndryshimit institucional.

Pjesëmarrësit u angazhuan në mënyrë aktive gjatë gjithë sesioneve, duke kontribuar në diskutime, punë në grupe dhe ushtrime praktike. Si rezultat kyç i fazës pilotuese, pjesëmarrësit zhvilluan dhe përpunuan ide konkrete dhe inovative për change projects, të cilat do t’i zbatojnë në institucionet e tyre gjatë gjashtë muajve të ardhshëm.

Zbatimi me sukses i Programit për Zhvillimin e Lidershipit përbën një hap të rëndësishëm në realizimin e objektivave të projektit LEADALKO dhe kontribuon drejtpërdrejt në forcimin e kapaciteteve drejtuese, zhvillimin institucional dhe nxitjen e ndryshimeve të qëndrueshme në institucionet e arsimit të lartë në Kosovë dhe në rajon.