Fakulteti Juridik, më datë 20.05.2026, organizoi një ligjëratë të veçantë akademike në kuadër të lëndës “E Drejta Ndërkombëtare për të Drejtat e Njeriut”, bartës i së cilës është Prof. Asoc. Dr. Besnik Murati.

Në këtë aktivitet akademik, ligjërues i ftuar ishte Prof. Asoc. Dr. Orhan Çeku, i cili trajtoi temën: “Gjenocidi – përkufizimi dhe format e kryerjes së tij”.

Gjatë ligjëratës u trajtuan në mënyrë të detajuar aspektet juridike dhe akademike të konceptit të gjenocidit, përfshirë përkufizimin e tij sipas instrumenteve ndërkombëtare, elementet përbërëse të këtij krimi ndërkombëtar, si dhe format dhe mënyrat e manifestimit të tij në praktikën bashkëkohore ndërkombëtare.

Prof. Çeku theksoi rëndësinë e së drejtës ndërkombëtare penale dhe mekanizmave ndërkombëtarë në parandalimin dhe ndëshkimin e krimeve të gjenocidit, duke ofruar një analizë të thelluar mbi zhvillimin historik dhe juridik të këtij nocioni. Po ashtu, gjatë ligjëratës u zhvillua edhe një diskutim interaktiv me studentët lidhur me sfidat juridike dhe praktike në identifikimin dhe trajtimin e rasteve të gjenocidit në nivel ndërkombëtar.

Ligjërata u përcoll me interesim të madh nga studentët dhe pjesëmarrësit e tjerë, duke kontribuar në avancimin e njohurive akademike dhe profesionale në fushën e të drejtës ndërkombëtare për të drejtat e njeriut.