Universiteti “Isa Boletini” në Mitrovicë (UIBM) do të bashkëpunojë me Dhomën Britanike të Tregtisë në Kosovë (BCCK), në fusha me interes reciprok. Për krijimin e një kornize të përgjithshme për bashkëpunim institucional të enjten është nënshkruar Memorandumi i Bashkëpunimit nga rektorja e UIBM, prof.dr. Nurten Deva dhe drejtori ekzekutiv i CEO, Bekim Kastrati, si përfaqësues i BCCK.

Në kuadër të Memorandumit të Bashkëpunimit janë paraparë edhe objektivat, si: Zhvillimi dhe forcimi i marrëdhënieve institucionale ndërmjet palëve, promovimi i bashkëpunimit ndërmjet komunitetit të biznesit, akademisë, studiuesve, studentëve dhe profesionistëve, Nxitja e kërkimit shkencor, inovacionit, shkëmbimit të njohurive dhe zbatimit praktik të ekspertizës akademike, Identifikimi dhe zhvillimi i mundësive për projekte dhe programe të përbashkëta që kontribuojnë në zhvillimin arsimor, shkencor, teknologjik, ekonomik, mjedisor dhe shoqëror, Lehtësimi i bashkëpunimit ndërmjet bizneseve, institucioneve akademike, autoriteteve publike dhe palëve të tjera përkatëse të interesit etj.

Në këtë kontekst janë përfshirë edhe promovimi i ndërmarrësisë, zhvillimit profesional, aftësive dhe harmonizimit të ekspertizës akademike me nevojat e tregut të punës dhe të biznesit, nxitja e bashkëpunimit kombëtar dhe ndërkombëtar, përfshirë partneritetet me institucionet dhe organizatat britanike dhe ato të vendeve të tjera, krijimi i bazës për propozimin, zhvillimin, zbatimin, koordinimin dhe menaxhimin e projekteve të përbashkëta përmes marrëveshjeve të veçanta.

Në dokument janë përcaktuar qartë edhe obligimet e palëve për zbatimin e Memorandumit të Mirëkuptimit. Rektorja Deva dhe drejtori Kastrati, e kanë vlerësuar si një nismë të mirë që krijon mundësi si për komunitetin universitar ashtu edhe për biznesin.