Janë ndarë certifikata mirënjohjeje për studentët që kanë kontribuar në mënyrë aktive në Konferencën Ndërdisiplinare të Gjeoshkencave IMGC 2025, e mbajtur më 16–17 tetor 2025. Certifikatat u ndanë si vlerësim për kontributin e tyre në panelin me temë “Mineralet kritike, ekonomia ciklike dhe roli i gjeoshkencëtarëve të së ardhmes”.

Paneli përfaqësoi një hapësirë të rëndësishme shkencore për diskutimin e çështjeve bashkëkohore që lidhen me shfrytëzimin e qëndrueshëm të mineraleve kritike, zhvillimin e ekonomisë ciklike dhe rolin strategjik të gjeoshkencëtarëve të rinj në adresimin e sfidave globale. Studentët pjesëmarrës u dalluan për përgatitjen e tyre akademike, mendimin kritik dhe kontributin cilësor në diskutimet profesionale.

Certifikatat u ndanë nga Kryetari i Këshillit Organizativ, Prof. Dr. Kemajl Zeqiri, i cili vlerësoi përkushtimin e studentëve dhe theksoi rëndësinë e përfshirjes së tyre në aktivitete shkencore ndërkombëtare si pjesë thelbësore e formimit të tyre akademik dhe profesional.

Universiteti vazhdon të mbështesë dhe të inkurajojë pjesëmarrjen aktive të studentëve në konferenca dhe panele shkencore, duke nxitur zhvillimin e njohurive, inovacionin dhe angazhimin e tyre në fusha me rëndësi strategjike për shoqërinë dhe zhvillimin e qëndrueshëm.